Íslenskar jarðvísindakonur heiðraðar!

3.5.2016 Sigurjon
Jarðvísindakonur heiðraðar

Alþjóðasamtökin Women in Geothermal (WING) heiðruðu tvær íslenskar jarðvísindakonur sem staðið hafa framarlega í útbreiðslu jarðhitanotkunar í heiminum. Það voru þær Hrefna Kristmannsdóttir og Ragna Karlsdóttir sem tóku við brautryðjendaverðlaunum úr hendi Ragnheiðar Elínar Árnadóttur, iðnaðar- og viðskiptaráðherra, í móttöku sem samtökin gengust fyrir í tengslum við alþjóðlegu jarðhitaráðstefnuna Iceland Geothermal Conference, sem fram fór í Hörpu dagana 26. til 28. apríl.
Mikilvægt framlag í þróun jarðhitanýtingar
Hrefna var fyrsta íslenska konan til að ljúka doktorsprófi í jarðfræði. Það gerði hún frá Oslóarháskóla árið 1970. Hún átti langan starfsferil sem jarðefnafræðingur á Orkustofnun og átti þátt í að þróa efnafræðilegar aðferðir við mat á jarðhitaholum sem nú er beitt við allar slíkar boranir. Hrefna hefur verið mikilvirk á vísindasviðinu og skrifað um 100 greinar sem birst hafa í vísindatímaritum.
Ragna Karlsdóttir er jarðeðlisfræðingur sem einnig starfaði lengi hjá Orkustofnun og nú síðari ár hjá ÍSOR. Þar hóf hún störf árið 1970 og hefur komið að rannsóknum, líkanagerð og auðlindamati á öllum þeim háhitasvæðum sem nýtt eru hér á landi og flestum lághitasvæðunum með einhverjum hætti.
Báðar hafa þær Ragna og Hrefna komið að starfi Jarðhitaskóla Sameinuðu þjóðanna, sem rekinn er hér á landi.
Móðir jarðhitavatnsins
Viðurkenningin sem þær hlutu var í formi skartgrips sem er sóttur til Maoría, frumbyggja Nýja Sjálands. Það er mikið jarðhitaland og táknar gripurinn Taporerangi, sem er móðir hveravatnsins í sögum Maoría.
WING eru samtök sem hvetja til framgangs kvenna innan jarðhitageirans, styðja við konur sem þar starfa og leitast við að gera störf þeirra á þeim vettvangi sýnilegri. Samtökin voru stofnuð 2013. Móttaka WING fór fram lokadag jarðhitaráðstefnunnar í Sjóminjasafninu og var haldin í félagi við Konur í orkumálum, sem eru samtök kvenna sem starfa við orkumál á Íslandi. Þau samtök eru líka ný af nálinni.
Auk iðnaðar- og viðskiptaráðherra ávarpaði Andrea Blair, forseti WING, samkomuna.