Bjarni Pálsson nýr formaður Jarðhitafélags Íslands

17.4.2012 Gústaf Skúlason Á aðalfundi Jarðhitafélags Íslands var Bjarni Pálsson, deildarstjóri virkjunardeildar á þróunarsviði Landsvirkjunar, kjörinn formaður samtakanna til næstu tveggja ára. Bjarni hefur setið í stjórn félagsins sl. fjögur ár, síðustu tvö árin sem varaformaður. Þá hefur hann setið undanfarin tvö ár í stjórn IGA, Alþjóða jarðhitasambandsins. Bjarni tekur við af Jakobi S. Friðrikssyni hjá Orkuveitu Reykjavíkur sem verið hefur formaður síðustu tvö ár. Á fundinum voru jafnframt kjörin ný í stjórn þau Kristín Vala Matthíasdóttir efnaverkfræðingur hjá HS Orku og Magnús Þór Jónsson prófessor í véla- og iðnaðarverkfræði við Háskóla Íslands. Ásgeir Margeirsson og Sigurður M. Garðarsson gáfu ekki kost á sér til áframhaldandi stjórnarsetu. Áfram sitja ennfremur í stjórn, kjörnir til tveggja ára á aðalfundi 2011, þeir Claus Ballzus, Gústaf Adolf Skúlason og Magnús Ólafsson. Nánari upplýsingar um aðalfundinn (fundargerð, skýrslu stjórnar og ársreikning 2011) má nálgast hér.